काठमाडौं । नेपाल प्रिमियर लिग (एनपीएल)मा सुदूरपश्चिम रोयल्सले लगातार दोस्रो जित निकालेको छ । कीर्तिपुरस्थित त्रिभुवन विश्वविद्यालय क्रिकेट मैदानमा आज बिहीबार भएको खेलमा सुदूरपश्चिमले काठमाडौं गुर्खाजलाई ७३ रनले पराजित गरेको हो ।

जारी प्रतियोगितामा काठमाडौँ गुर्खाजको यो तेस्रो खेल हो । यसअघिका दुई खेलमध्ये काठमाडौँले एक खेलमा विजयी भएको छ भने एक खेलमा पराजय भोगेको छ । काठमाडौँ गुर्खाज पहिलो खेलमा चितवन राइनोजसँग पाँच विकेटले पराजित भएको थियो भने दोस्रो खेलमा भने काठमाडौँले कर्णालीलाई तीन विकेटले हराएको थियो । त्यस्तै, जारी सुदूरपश्चिम रोयल्सको यो दोस्रो खेल हो । पहिलो खेलमै सुदूरपश्चिम रोयल्सले विराटनगर किङ्ग्सलाई ९० रनले पराजित गर्दै प्रतियोगितामा सुखद् सुरूआत गरेको थियो ।

आजको खेलमा सुदूरपश्चिमले दिएको १६८ रनको लक्ष्य पछ्याएको काठमाडौंले १५.५ ओभरमा सबै विकेट गुमाउँदै ९४ रन मात्रै बनाउन सक्यो । यो सँगै अपराजित रहेको सुदूरपश्चिम चार अंकसहित दोस्रो स्थानमा उक्लिएको छ । सुदूरपश्चिमलाई लगातार जित दिलाउन ३.५ ओभर बलिङ गरेका नरेनले १९ रन मात्रै खर्चिए सर्वाधिक पाँच विकेट लिए । काठमाडौंका स्टेफन इस्कान्जीले सर्वाधिक ३७ रन बनाए । ३३ बल खेलेका उनले पाँच चौका र एक छक्का प्रहार गरे । सुमित महर्जन १० रनमा आउट हुँदा भीम सार्की र ग्रेहार्ड इरास्मसले समान १० रन बनाए । अन्यले दोहोरो अंकमा रन बटुल्न सकेनन् । सुदूरपश्चिमका अविनाश बोहराले दुई विकेट लिँदा ब्रान्डन म्याकमुलन र सैफ जैबले समान एक विकेट लिए ।

त्यसअघि टस हारेर पहिला ब्याटिङ थालेको सुदूरपश्चिमले निर्धारित २० ओभरमा ६ विकेट गुमाउँदै १६७ रन बनाएको थियो । सुदूरपश्चिमका म्याकमुलनले सर्वाधिक ५३ रन बनाए । ३६ बल खेलेका उनले तीन चौका र चार छक्का प्रहार गरे । दीपेन्द्रसिंह ऐरीले २५ बलमा तीन चौका र दुई छक्कासहित ४३ रनको योगदान दिए । विनोद भण्डारी ३५ र जैब ११ रनमा आउट भए । काठमाडौंका रसिद खानले सर्वाधिक दुई विकेट लिए । करण केसी र शहब आलमको नाममा समान एक विकेट रह्यो ।