काठमाडौं । नेपाल प्रिमियर लिग (एनपीएल)को आज बुधबारको रोमाञ्चक खेलमा विराटनगर किंग्सले लुम्बिनी लायन्सलाई हराएको छ । कीर्तिपुरस्थित त्रिभुवन विश्वविद्यालयको क्रिकेट मैदानमा विराटनगरले लुम्बिनीलाई दुई विकेटले हराएको हो । 

लुम्बिनीले विराटनगरलाई जितका लागि एक सय ९२ रनको लक्ष्य दिएको थियो । सो विशाल लक्ष्य विराटनगरले एक बल बाँकी छँदै पूरा गर्यो । अन्तिम ओभरमा ब्याटिङ गर्न आएका क्रिस सोलेले ४ बलमा १४ रनको विजयी ईनिङ्स खेले । सुरुवाती दुई खेल हारेर दबाबमा आएको विराटनगरलाई तेस्रो खेलमा प्राप्त जितले राहत दिएको छ । बिशाल लक्ष्य पछ्याएको विराटनगरका लागि लोकेश बलमे ७१ रनको शानदार ईनिङ्ससहित राम्रो सुरुवात दिलाएका थिए । मार्टिन गुप्टिलले २८ र बासिर अहमदले ४० रन बनाएर पूर्वेली टिमको जितको आधार खडा गरेका थिए । खेलको अन्तिम समयमा कप्तान सन्दीप लामिछाने एक रनमा आउट भएपछि दबाबमा आएको विराटनगरलाई क्रिस सोलेले सम्हाले । उनले अन्तिम ओभरमा २ चौका र १ छक्का प्रहार गर्दै विराटनगरलाई प्रतियोगितामा पहिलो जित चखाए ।

लुम्बिनीका दुर्गेस गुप्ताले तीन तथा रोमन सिमोन्डस र साद विन जाफरले समान दुई दुई विकेट लिएका थिए । विवेक यादवको नाममा एक विकेट रह्यो । पहिलो ईनिङ्समा ब्याटिङ गरेको लुम्बिनीले ७ विकेट गुमाएर १ सय ९१ रनको प्रतियोगिताकै उच्च स्कोर खडा गरेको थियो । कप्तान रोहित पौडलको ४६ रनबाट प्रेरित लुम्बिनीका लागि टम मोरिसले ३० रन बनाएका थिए । लुम्बिनीले २९ रन अतिरिक्त प्राप्त गरेको थियो । विराटनगरका सन्दीप लामिछाने, इस्मत अलाम र राजेश पुलामीले समान एक एक लिए । विराटनगरले तीन खेलबाट पहिलो जित निकाल्दै दुई अंक जोडेको छ । लुम्बिनी पहिलो खेलमा पराजित हुँदै अंक जोड्न असफल भएको छ ।