काठमाडौं । सामाजिक सञ्जालमा युवतीको चरित्रहत्या गरेको अभियोगमा एक व्यक्ति पक्राउ परेका छन् । प्रहरीले नुवाकोट शिवपुरी गाउँपालिका बस्ने ३८ वर्षीय सुरेन्द्र केसीलाई बुधबार पक्राउ गरेको हो । 

प्रहरीका अनुसार केसीले पीडित युवतीलाई सामाजिक सञ्जालमा साथी बनाई प्रेम प्रस्ताव राखी भिडियो कलको क्रममा गरिएको रेकर्ड पीडित र पीडितको आफन्तलाई समेत पठाई अपमान र बेइज्जत गरी चरित्र हत्या गर्दै आएका थिए । उनलाई पीडितको उजुरीको आधारमा साइबर ब्यूरोबाट खटिएको प्रहरीले पक्राउ गरेको हो ।

उनलाई विद्युतीय कारोबार ऐन, २०६३ अन्तर्गतको कसूरमा जिल्ला अदालत काठमाडौंबाट पाँच दिन म्याद थप अनुमति लिई यस सम्बन्धमा प्रहरीले आवश्यक अनुसन्धान गरिरहेको जनाएको छ ।