काठमाडौं । अपहरण तथा शरीर बन्धक सम्बन्धी कसूरमा संलग्न रहेको अभियोगमा दुई जनालाई आइतबार दिउँसो प्रहरीले पक्राउ गरेको छ । पक्राउ पर्नेहरूमा वीरगंज महानगरपालिका-१६ ईनर्वागाउँ बस्ने ३० वर्षीय सन्तोष दास तत्मा र सोही महानगरपालिका-१६ नगवा बस्ने ३१ वर्षीय हरिशंकर शर्मा रहेका छन् । 

रौतहट कटहरिया नगरपालिका बस्ने ४१ वर्षीय पुरूषलाई आइतबार अपहरण गरी फिरौती रकम माग गरेको भन्ने उजुरीको आधारमा जिल्ला प्रहरी कार्यालय पर्साबाट खटिएको प्रहरीले उनीहरूलाई वीरगंज महानगरपालिका-१६ ईनर्वागाउँबाट पक्राउ गरेको हो । प्रहरीले उनीहरूको साथबाट नगद ५० हजार रूपैयाँ र अपहरणमा प्रयोग गरेको दुई थान मोटरसाइकलसमेत बरामद गरेको छ ।

उनीहरू उपर अपहरण तथा शरीर बन्धक कसूरमा जिल्ला अदालत पर्साबाट सात दिन म्याद थप अनुमति लिई यस सम्बन्धमा प्रहरीले आवश्यक अनुसन्धान भइरहेको जनाएको छ ।