काठमाडौं । वैदेशिक रोजगारमा आकर्षक तलबको प्रलोभनमा पारी कोरिया पठाइदिन्छु भन्दै रकम ठगी गरेको अभियोगमा एक व्यक्ति पक्राउ परेका छन् । कोरिया पठाइदिन्छु भन्दै चार जनाबाट नौ लाख रूपैयाँ लिई फरार सोलुखुम्बु पासाङल्हामु गाउँपालिका घर भई काठमाडौं टोखा नगरपालिका बस्ने ५२ वर्षीय गिता बहादुर मगरलाई प्रहरीले शुक्रबार पक्राउ गरेको हो । 

गिताले कोरिया पठाइदिन्छु भन्दै चार जना पीडितहरूबाट नौ लाख रूपैयाँ लिई सम्पर्कविहीन भएको भन्ने पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उनलाई काठमाडौंबाट पक्राउ गरेको हो । प्रहरीले उनलाई आवश्यक अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको जनाएको छ ।