काठमाडौं । चिनियाँको एक कम्पनीले नेपालमा विद्युतीय गाडी उत्पादनका लागि तीन अर्ब रूपैयाँ वैदेशिक लगानी गर्ने सम्झौता गरेको छ । चिनियाँ कम्पनी सिएन गोल्ड ड्रागन अटोबडीले लगानी सम्मेलनको अवसर पारेर नेपालको कोशी एनके मोटर्ससँगको सहकार्यमा वार्षिक पाँच हजार थानभन्दा बढी गाडी उत्पादन गर्ने योजना सार्वजनिक गरेको हो ।
कम्पनीले सुरूमा व्यावसायिक प्रयोजनमा प्रयोग हुने चार पांग्रे सवारीसाधन उत्पादनमा जोड दिने जनाएको छ । कोशी एनके मोटर्सका अध्यक्ष टिकाराम पुरीका अनुसार यहीँ वर्षबाट गाडी उत्पादन सुरू गर्ने योजना छ ।
उनले यो उत्पादनसँगै पहिलोपटक मुलुकमै विद्युतीय गाडी उत्पादन गर्न लागेको बताएका छन् । जसको लागि गाडी उत्पादनका लागि प्रविधि उपकरण सबै चिनियाँ हुनेछ भने गाडी नेपाली ब्राण्डमै बिक्री हुने उनले बताए ।
प्लान्टका लागि कम्पनीले विराटनगरको बूढीगंगामा १५ बिगाहा जग्गा लिइसकेको उनले जानकारी दिए । कम्पनीले १४, १८ र १२ सिट क्षमताको कमर्सियल गाडी उत्पादन गर्ने उनले बताए । पुरी निजी विद्यालयको छाता संगठनका पूर्व अध्यक्षसमेत हुन् ।
